Bakı Xoreoqrafiya Akademiyasının (BXA) tam orta təhsil pilləsinin təşkilatçılığı ilə 12 dekabr Ulu Öndərin anım gününə həsr olunmuş “Ümummilli lider Heydər Əliyev” başlığı altında tədbir keçirilib. Tədbirdə BXA-nın rəhbərliyi və müəllim-şagird heyəti iştirak edib.
Tədbir Azərbaycan Respublikasının Dövlət Himni ilə açıq elan olunub.
Öncə Ulu Öndərin zəngin həyatı, siyasi fəaliyyəti və Azərbaycan naminə həyata keçirdiyi misilsiz tarixi xidmətlərinə həsr olunmuş videoçarx nümayiş etdirilib. Daha sonra tam orta təhsil pilləsinin şagirdlərinin ifasında dahi şəxsiyyət Heydər Əliyevə həsr olunmuş şeir nümunələri, “Ay Laçın” və “Lirik rəqs” rəqs kompozisiyaları təqdim olunub. Tədbir çərçivəsində Heydər Əliyevin ölkəmizə rəhbərliyi dövründə Azərbaycanda milli kadrların hazırlanması, ana dilimizin inkişaf etdirilməsi, elm və incəsənət adamlarına göstərilən qayğı, bütün elm və qeyri sahələrdə həyata keçirilən inkişaf proqramlarından bəhs olunub. Sonda Şuşanın Cıdır düzündə keçirilən “Xarıbülbül” musiqi festivalında Ümummilli lider H. Əliyevin Şuşa və Qarabağla bağlı arzularını əks etdirən videoçarx nümayiş olunub. Həmin görüntülərdə Prezident İlham Əliyevin də Şuşa ilə bağlı tarixi çıxışı öz əksini tapıb.
