Müəllim
Qısa bioqrafik məlumat
Quliyev Əli Nüsrət oğlu 1 sentyabr 1952-ci ildə Bakı şəhərində anadan olmuşdur. 1959-cu ildə Bakı şəhərində yerləşən 99 nömrəli orta məktəbin I sinfinə daxil olmuş, 1967-ci ildə həmin məktəbdə orta təhsilini başa vurmuşdur.
Musiqiyə olan marağı və istedadı onu elə həmin ildə Asəf Zeynallı adına Musiqi Texnikumuna gətirmişdir. Təhsil aldığı dövrdə peşəkar yaradıcılıq fəaliyyətinə başlamış, Azərbaycan Dövlət Rəqs Ansamblında və Azərbaycan Dövlət Filarmoniyasında fəaliyyət göstərərək zəngin sənət təcrübəsi qazanmışdır.
1971-ci ildə Asəf Zeynallı adına Musiqi Texnikumunu müvəffəqiyyətlə bitirdikdən sonra təhsilini davam etdirmək məqsədilə Üzeyir Hacıbəyli adına Azərbaycan Dövlət Konservatoriyasının Xalq Çalğı Alətləri fakültəsinin kamança ixtisasına qəbul olunmuşdur.
Əmək fəaliyyətinə 1971-ci ildə 11 nömrəli Uşaq Musiqi Məktəbində kamança müəllimi kimi başlamışdır. 1973–1975-ci illərdə Moskva şəhərində hərbi xidmət keçmişdir. Hərbi xidmətini başa vurduqdan sonra Vətənə qayıdaraq pedaqoji fəaliyyətini davam etdirmiş və ömrünü milli musiqi sənətinin inkişafına, gənc nəslin musiqi təhsilinə həsr etmişdir.
Quliyev Əli Nüsrət oğlu uzun illərdir ki, kamança müəllimi kimi səmərəli fəaliyyət göstərir, Azərbaycan musiqi ənənələrinin qorunması, təbliği və gələcək nəsillərə ötürülməsi istiqamətində mühüm xidmətlər göstərir. Onun çoxillik pedaqoji fəaliyyəti peşəkarlığı, zəngin təcrübəsi və milli musiqi irsinə sadiqliyi ilə səciyyələnir.