Prorektorlar

Pənahova Elmira Pənah qızı 16 oktyabr 1979-cu ildə Qazaxıstanın Aktau şəhərində anadan olub. 1996-cı ildə Ü. Hacıbəyli adına Bakı Musiqi Akademiyasının Məktəb-Studiyasını fortepiano ixtisası üzrə bitirib. 1996–2000-ci illərdə Üzeyir Hacıbəyli adına Bakı Musiqi Akademiyasının (BMA) “Tarix-nəzəriyyə” fakültəsində musiqişünas və fortepiano ixtisasları üzrə təhsil alıb. 2000–2002-ci illərdə BMA-nın “Musiqişünaslıq” fakültəsinin magistraturasında təhsil alıb.

E.Pənahova 2007-ci ildə professor S. A. Seyidovanın rəhbərliyi altında yazdığı “Yaxın Şərq xalqları musiqisinin lad sistemlərinin müqayisəli təhlili” adlı namizədlik dissertasiyasını uğurla müdafiə etmiş və nəticədə sənətşünaslıq üzrə fəlsəfə doktoru elmi dərəcəsi adını alıb. 2017-ci ildə E. P. Pənahova BMA-na elmlər doktoru proqramı üzrə dissertanturaya qəbul olunub. Hazırda doktorluq dissertasiyası üzərində çalışır.

1998-ci ildən E.P. Pənahova Q. Qarayev adına Mərkəzi İncəsənət Məktəbində nəzəriyyə şöbəsinin müəllimi vəzifəsində çalışır. Məktəbdə işlədiyi müddətdə konsertmeyster fəaliyyətinə görə Fəxri fərman və diplomlarla təltif edilib. 2005-ci ildən Ü.Hacıbəyli adına Bakı Musiqi Akademiyasının “Musiqi nəzəriyyəsi” kafedrasında müəllim, 2009-cu ildən baş müəllim, 2014-cü ildən isə dosent vəzifəsində işləyir.

2021-ci ildə Azərbaycan Respublikasının Mədəniyyət naziri tərəfindən Bakı Xoreoqrafiya Akademiyasının Elm və yaradıcılıq işləri üzrə prorektoru vəzifəsinə təyin edilib. E. Pənahova dərs vəsaitləri, metodik vəsait, elmi məqalələr və oçerklər, proqramlar müəllifi, respublika və beynəlxalq konfrans iştirakçısı, kitab, dərs və not vəsaitləri, elmi-metodik işlər toplusunun redaktorudur.

2015-ci ildə E. Pənahova “Üzeyir Hacıbəylinin milli lad sistemi gənc musiqiçilərin tədris repertuarında” I Respublika festivalında, 2016-cı ildə isə Qara Qarayev adına “Təhlil və ifa edir gənc musiqiçilər” III Respublika elmi-ifaçılıq müsabiqəsində münsif olub.

Bundan başqa, o, 2017-ci ildə keçirilən Qara Qarayev adına Mərkəzi İncəsənət Məktəbinin yaranmasının 80 illiyinə həsr olunmuş Klassik Musiqi və Folklorun Gənc İfaçılarının “WORLD HARMONY” adlı I Beynəlxalq Müsabiqəsinin təşkilat işlərində yaxından iştirak edib, 2019-cu ildə isə Azərbaycan Respublikasının Mədəniyyət Nazirliyinin və Müstəqil Dövlətlər Birliyinin üzv dövlətlərinin Dövlətlərarası İctimai Əməkdaşlıq Fondunun dəstəyi ilə keçirilən Klassik Musiqi və Folklorun Gənc İfaçılarının “WORLD HARMONY” adlı II Beynəlxalq Müsabiqəsinin təşkilat komitəsinin üzvü olub.

2020-ci və 2021-ci illərdə Litvanın Vilnüs şəhərində keçirilən “Reflections of traditional culture in music” adlı Beynəlxalq konfransda şagirdlərinin onun rəhbərliyi altında hazırladığı məruzə-təqdimatları böyük uğur qazanıb və E. P. Pənahova sertifikatlarla təltif olunub.