Hörmətli professor-müəllim heyəti, dəyərli əməkdaşlar və əziz tələbələr!
Sizi müqəddəs Ramazan və Azərbaycan xalqının milli-mənəvi kimliyini, zəngin mədəni irsini özündə əks etdirən Novruz bayramı münasibətilə Bakı Xoreoqrafiya Akademiyasının rəhbərliyi adından və şəxsən öz adımdan təbrik edirəm.
Ramazan ayı bəşəri dəyərlərin, mənəvi saflığın, sosial həmrəyliyin və məsuliyyət hissinin daha dərindən dərk olunduğu xüsusi bir dövrdür. Bu ay insanın daxili dünyasının zənginləşməsinə, cəmiyyət daxilində qarşılıqlı etimadın və humanist münasibətlərin möhkəmlənməsinə xidmət edir. İnanıram ki, bu müqəddəs ayın aşıladığı ali dəyərlər Akademiyamızın elmi-pedaqoji mühitində də daha güclü şəkildə təzahür edərək həm fərdi, həm də institusional inkişafımıza töhfə verəcəkdir.
Novruz bayramı isə təkcə təbiətin oyanışı deyil, eyni zamanda milli özünüdərk, yenilənmə və davamlı inkişaf fəlsəfəsinin təcəssümüdür. Bu bayramın daşıdığı ideyalar – innovasiyalara meyillilik, ənənələrə sədaqət və gələcəyə inam – müasir ali təhsil məkanında strateji yanaşmaların formalaşması baxımından xüsusi əhəmiyyət kəsb edir.
Bakı Xoreoqrafiya Akademiyası bu dəyərləri əsas götürərək milli rəqs sənətimizin qorunması, inkişafı və beynəlxalq elmi-mədəni platformalarda təbliği istiqamətində ardıcıl fəaliyyət göstərir. Akademiyamızın prioritetləri sırasında yüksək ixtisaslı kadr hazırlığı, innovativ tədris metodlarının tətbiqi, yaradıcılıq potensialının inkişafı və qlobal mədəni inteqrasiyanın gücləndirilməsi xüsusi yer tutur. Bu məqsədlərə nail olmaqda sizin hər birinizin əməyi, peşəkarlığı və təşəbbüskarlığı mühüm əhəmiyyət kəsb edir.
Əminəm ki, milli-mənəvi dəyərlərdən güc alan və müasir çağırışlara adekvat cavab verən Akademiyamız bundan sonra da yeni uğurlara imza atacaq, Azərbaycan xoreoqrafiya sənətinin inkişafında aparıcı mövqeyini daha da möhkəmləndirəcəkdir.
Bu əlamətdar bayramlar münasibətilə hər birinizə möhkəm cansağlığı, yüksək elmi və yaradıcılıq nailiyyətləri, davamlı inkişaf və firavan həyat arzulayıram. Qoy Ramazan ayının mənəvi kamilliyi və Novruz bayramının yenilənmə ruhu fəaliyyətinizə ilham, həyatınıza isə uğur və bərəkət gətirsin.
Bayramlarınız mübarək!
Hörmətlə,
Bakı Xoreoqrafiya Akademiyasının Tədris işləri üzrə prorektoru,
rektor vəzifəsini icra edən,
Azərbaycan Respublikasının əməkdar artisti
Nailə Məmməd-Zadə
