Bakı Xoreoqrafiya Akademiyasının müəllimi, Əməkdar artist Elçin Allahverdov 5-8 noyabr tarixlərində Balakən rayon Uşaq İncəsənət Məktəbində ustad dərsləri keçirib.
Ustad dərslərində məktəbin xoreoqrafiya ixtisası üzrə təhsil alan şagird kollektivinə milli rəqsin tədrisi və metodikası haqqında ətraflı məlumat verilib. Azərbaycan rəqslərində əsas əl-qol, çiyin, gövdə, baş hərəkətləri və digər icra elementləri əyani şəkildə təqdim edilərək izah olunub.
Ustad dərsləri çərçivəsində E. Allahverdov həmçinin, Balakən rayonunda tanınmış sənətkar, tar ustası Aydın Tağıyevin 90 illik yubileyinə həsr olunmuş “Tarixdən bu günümüzə süzülən tar sənəti” mövzusunda konfrans-konsertdə və Zəfər Gününə həsr edilmiş bayram konsertində də iştirak edib.
Qeyd edək ki, 8 noyabr tarixində Zəfər Gününə həsr edilmiş konsert proqramında BXA müəlliminin quruluşunda dahi Ü. Hacıbəylinin “Koroğlu” operasından “Cəngi” musiqisi üzərində tərtib edilmiş rəqs kompozisiyası nümayiş edilib.