Türkiyənin Ankara şəhərində TÜRKSOY Baş Katibliyi və Hacettepe Universiteti Ankara Dövlət Konservatoriyası Direktorluğunun əməkdaşlığı ilə Türk Dünyası Beynəlxalq “Ankara” Peşəkar Dövlət Xoreoqrafiya və Balet Məktəbləri Festivalı keçirilib.
Festivalda Azərbaycan, Türkiyə, Özbəkistan, Qazaxıstan və Qırğızıstanın konservatoriya, eləcə də xoreoqrafiya məktəblərinin nümayəndələri, həmçinin mədəniyyət xadimləri iştirak ediblər.
Sözügedən festivalda Azərbaycanı Bakı Xoreoqrafiya Akademiyasının nümayəndə heyəti: akademiyanın Xarici əlaqələr üzrə prorektoru, Xalq artisti, dosent Təranə Muradova, xoreoqraf-müəllim Mehriban Nəzərova, tam orta təhsil pilləsinin şagirdi Fidan Axundzadə, orta ixtisas təhsili pilləsinin tələbəsi Məryəm Əliyeva təmsil edib.
Tədbir çərçivəsində Xalq artisti Təranə Muradova və xoreoqraf-müəllim Mehriban Nəzərova türk dilli ölkələrin tələbələrinə ustad dərsləri keçirib.
Eyni zamanda, Təranə Muradova festival çərçivəsində keçirilən konfransda da çıxış edib. Xalq artisti çıxışında Azərbaycanda xoreoqrafiyanın yaranması, inkişafı barədə ətraflı məlumat verib. T. Muradova türk dilli ölkələrə bir neçə təklif də səsləndirib. O, bütün türk dünyasının xoreoqrafiya sahəsi üçün ortaq dərs proqramının yaradılmasını, tələbə-müəllim mübadiləsi proqramlarının genişləndirilməsini, qarşılıqlı ustad dərslərinin daha çox keçirilməsini təklif edib. Tədbirdə türk dövlətlərinin ortaq fəaliyyətlərinin genişləndirilməsi məqsədilə protokol da imzalanıb. Konfransın sonunda BXA-nın Xarici əlaqələr üzrə prorektoru TÜRKSOY tərəfindən «Türk Dünyası Dövlət Balet və Xoreoqrafiya İdarəçiləri»nin iclasında iştirak və əməyə görə mükafatlandırılıb.
Festivalın sonunda isə qala konserti keçirilib. Konsertdə Bakı Xoreoqrafiya Akademiyasının şagird və tələbəsi maraqlı rəqs kompozisiyası ilə çıxış edib.
